زملاء

ريم فاضل : بوست طائفي عن الشعب لا عن المعارضة ولا عن النظام

في الدولة المدنية الإنسان أولاً

الحوالات الخارجية بحلب حصراً من مكتب وحيد بمنطقة المسيحية اسمها السليمانية “ماعنده غير كمبيوتر واحد وموظفين والاعمتاد على الفاكس مو على الانترنت ” الانتظار من أسبوع يومياً من 7 صباحاً حتى 7 مساء 12 ساعة على رجليك واحتمال 70 بالمية ماتقبض … مئااااااات من الناس لا يمكن وصف الزحمة.. الكل عم ينتظر معونة من أخ, أب, قريب في الخارج … ناس جايين من المناطق الشرقية وكل يوم عم يعبروا وناس جايين من الضيع وناس جايين من مناطق الإسلام وناس جايين من مناطق المسيحية
بتشوف كل شي ..
بس لما بتشوف مسيحية صرلها أكتر من 10 ساعات واقفة بتعطي دورها لوحدة مسلمة بدها تعبر من معبر الموت بمساكن هنانو بتعرف أنو سوريا بعدها عم تنبض بالولاء السوري لا الطائفي
لما بتشوف مسلمة مخمرة بتقوم من على تنكة زيت ضلت ساعتين عم بدور عليها لترتاتح بتقوم وبتعطيها لختيارة مسيحية .. بتعرف أنو سوريا بعدها عم تنبض بالولاء السوري لا الطائفي
لما بتشوف عسكري علوي بيمنع واسطة شبيح علوي أعلى رتبة منه لأنو وحدة ” ماشاف وجها ” صاحت ” كنت ظانة أنو هالبدلة اللي لابسها رح تكون سندي”.. بتعرف أنو في بعسكر سوريا ناس بتنبض بالولاء السوري لا الطائفي
لما بتشوف كافتريا لواحد أرمني عم يدخل الناس المسلمة والمخمرة والسبور لحمامات الكافتريا بتعرف أنو سوريا بعدها عم تنبض بالولاء الإنساني لا القومي
لما بتشوف وحدة مسيحية عم تنزل مي للناس الواقفة على الدور ..
لما بتشوف كل النساء من كل الطوائف بقلب واحد عم يساندو بعضهم عم يشرشحو ويبهدلو وبيغسلو كل مين بيدخل بواسطة وبيعلى صوته على وحدة منهم … بتعرف أنو سوريا بعد الحرب ماعاد تسكت عن حقها ورح تكون إيد وحدة ليحصل كل مواطن على حقه بالحرية والعدالة والحياة الكريمة …
بحلب … اي نحن تعبانين فوق ما تتخيلو كآبتنا لا توصف بلحظة بننفجر بالقهر والدمع والدم والجوع …. عتمة وبرد ووحدة وحرمان وحرب ماعم تنتهي..
بتدخل على الفيس بتشوف الناس كيف عم تركض لتحصل على لجوء … الكل بيحكي عن داعش وعن الشبيحة وعن مليون راس وراس وحرامية ومناصب وإرهاب واستبداد ..
بتقول لحالك أنا غبي إذا صحتلي فرصة لجوء وضيعتها ؟
بس شوفي في الخارج ؟ ولاشي لا جار ولا ابن بلد ولا أرض ولا ذكريات ولا انتماء ولا أي شي ادافع عنه وتحميه … اي تحميه لأنو هو أنت وأنت هو .. في الخارج خواااااااء روحي مرعب ..
في الخارج نحن ولاشي .. وهون نحن كل شي .. يا رب بس شوية صبر لنكفي هالحرب وما نضعف نرتمى بشوارع التشرد ونبقى لحالنا هادا كل شي بدي ياه

ريم فاضل

 

اظهر المزيد

نشــــطاء الـرأي

نشــــــــطاء الـــرأي : كيان رمزي وخط إنساني لحرية الإنتقاد الثقافي و الفكري والسياسي ، بدعم مالي مستقل Organization for peace and liberty – OPL : www.opl-now.org

مقالات ذات صلة

زر الذهاب إلى الأعلى
error: الموقع لا يسمح بالنسخ ، من فضلك انسخ رابط المقال وارسلة لمن يرغب
إغلاق
إغلاق
%d مدونون معجبون بهذه: